Jehova Mwathani Kuma o Kiambiriria

Jehova Mwathani kuma o kiambiriria
Nduri wa tiganiria ndungata ciaku
Niumagitagira na uhotani muingi
Ngumo na ugoci irogucokerera

Chorus:

Ngumo na ugoci irogucokerera
Hindi iria ndungata ciaku ciaumagara
Utamburukitie moko iguru riao
Ngumo na ugoci irogucokerera

Riu ni menyete uria wi hinya muingi
Etagwo Jehova munene wa ita
Aria witongoreirie matihotagwo
Ngumo na ugoci irogucokerera

Chorus

Paulo na Sila maikio korokoro
Wamahinguriire mirango ya njera
Murangiri akiruta ruhiu eyurage
Ngumo na ugoci irogucokerera

Chorus

Petero na Johana makora kionje
Kiamahoya thendi na matiari nacio
Petero akimwira ukira witware
Ngumo na ugoci irogucokerera

Chorus

Mbara yaneneha Joshua erire ngai
Riua nirirugame o hau riri
Inginya nditorania kuri thu ciakwa
Ngumo na ugoci irogucokerera

Chorus

Manyita Mwathani na makimuraga
Muthenya wa itatu ni wamuriukirie
Akiuma kuri akuu na uhotani muingi
Ngumo na ugoci irogucokerera

Chorus

Maikirie Danieli irima ria miruthi
Nao Shadraka maikio mwaki-ini
Wamarutire kuo na uhotani muingi
Ngumo na ugoci irogucokerera

Chorus

Mwathani niwe riumagiriro riakwa
Ona ihundukiro nowe Mwathani
Ndeithagia kumenya uria wi hinya muingi
Ngumo na ugoci irogucokerera

Chorus